برهان بسيس يعلق على “أوهام” التبرع لتونس بـ4 ملايين تلقيح..!

0

نشر الاعلامي برهان بسيس، مساء امس الخميس، تدوينة تحدث فيها عن اعلان بعض الدول مساعدة تونس بكميات من التلاقيح في ازمتها الصحية بسبب فيروس كورونا.
وفي ما يلي نص التدوينة:

“بش نحكي بربي بشوية واقعية بعد جولة استيضاح من مجموعة من اهل الاختصاص… راهي قصة كميات التلاقيح الي تحكي بعض المصادر ان بعض الدول الصديقة والشقيقة أعلنت انها بش تتبرع بيها لتونس موش معناها انو الطيارات تملات بالتلاقيح وجابولنا الكميات الي تم الإعلان عليها….. سوق اللقاح العالمي راهو يشهد منافسة قوية نتيجة الاختلال بين العرض والطلب…. مخابر العالم تنتج في 800 مليون جرعة مقابل طلب يقدر ب8 مليار جرعة….. يعني كي تقول السعودية وغير السعودية انها بش تتبرع بمليون جرعة موش معناها تبرعت… هي فقط اعلان نوايا ينجم يخلطنا بالتقسيط على عام والا عامين ، هذا في حالة انو السعودية عملت قبلها اكتفاءها الذاتي في تلقيح متحور لمواجهة فيروس متحور…. ممثل مخبر سبوتنيك الروسي هو أحد الأصدقاء اعلمني انو تونس رغم أنها دفعت ثلاثين بالمائة من مبلغ لاقتناء 500الف جرعة تلقيح منذ 3اشهر فانها الي الان تنتظر انو الجانب الروسي يفي بالتزاماتو في هاذي الصفقة، علاش؟ خاطر سوق مخابر التلاقيح حاليا ذراعك يا علاف، الدول الاقوى ماليا ونفوذا وسرعة في الإجراءات هو الي يخطف الجرعات خطفان… صديقي قالي انو بلاد كي نيجيريا تبعث رجل اعمال ملي عندها ملي يخدمو في الذهب والبترول بفاليجات كاش ينحيلك بايك في التلاقيح الي انتي متعاقد عليهم مع المخبر الروسي….. هاذي راهي عركة مافيهاش الاب نوال والا سيدي بن عروس… شنية قوة اتصالاتك بمخابر التلاقيح وقدرتك انك تخطف ليك وكل الدول في العالم تسخر في إمكانياتها بش تكون موجودة في العركة هاذي… امكانات أمنية ومالية وشبكة علاقات واستخبارات وغيرها….. للمعلومة… السوق هاذي يتحكم فيها وسطاء… وللمعلومة ايضا وللأسف اغلب الوسطاء هاذم مرتبطين باللوبي الاسرائيلي عالميا….. المسألة معقدة راهي بش ما نبداوش نعملو في حساباتنا على اوهام….. تنجمو تسمعو اليوم تصريح وزير الصحة سي فوزي المهدي وقتلي سالوه حول توقيت وصول المليون جرعة متع السعودية قاللهم ما نعرفوش وما ينجمو يجيو كان ما تتحصل عليهم السعودية…… هاذي حرب طويلة الأمد ما انجمو نخوضوها كان بالحقايق موش بالاوهام!!!!!”.. ويذكر أن السلطات الصحية التونسية قدرت المساعدات الخارجية الأخيرة الخاصة بالتلاقيح ب4 ملايين جرعة ..

LEAVE A REPLY

Please enter your comment!
Please enter your name here