المنبر التونسي(الجليدي العويني) – قدم الشاعر الجليدي العويني في مدينة الثقافة في إطار أربعينية الرئيس الراحل الباجي قايد السبسي قصيدة في رثاء الرئيس.
وهذه القصيدة:
الله يرحمك يا باجي يخفف عليك ثقل الرمل والظلمه
الله يرحمك ياساجي مابين سبحة بلحسن وقلمه
مرحوم فقبرك توجعنا كسمعنا خبرك
ما شاحش حبرك لكن شاحت وردة عمرك
يا تونس صبرك عاللي كان معاك مقاجي من اول ما مشات الدوله خطوتها لولى بعد رحيل الليل الداجي عليك الرحمة يا سي الباجي.
يا جار الخلوه في العلوه
خارج في جنازة كالجلوه
والروح الحلوه
ترفرف في مولاها تناجي..
و الناس ال حسوا وتحسوا لا دفعهم واحد لا توصوا بالدمعه غصوا وجوا ترصوا في حر اوسو الله أكبر هزت لنهاجي
الله يغفرلك يا سي الباجي
موش اول مره خرجولك خرجولك كيف احتاجولك شتويه والرعد يطبل
في عز القره نادولك جيت بضحكاتك وحلولك
سلكت الخيط المتخيل في خريفك كصعب نزولك وقفت على طولك وما قعدتش في البرج العاجي
وبعدن قالوا الصيد هرم رجعولك في صيف الدم صيف الفجعة والقعباجي وعاودت الخلطة يا باجي
شتينا معاك وصيفنا واختلفنا وتخالفنا
وشكينا فيك وجرحنا
ونهار الفرقه تاسفنا وقفنا وهتفنا بره مسامحينك سامحنا الله يجعل قبرك متفاجي
مع الوجعه اللي علينا غارت
لقيناشمعتنا في الظلمه
ماهي تونس لما اختارت
اختارت تمشي طريق الحلمه
الله يرحم روحك وين صارت
وفيها ربي تمم علمه
الرحلة مهما تطول قصارت فيها حكمه
ويبقى ابن ادم فعل وكلمه ياراحل
من هضبة بوسعيد الباجي لراقوبة الزلاجي في كل هضبه قطب زارع علمه
الله يرحمك في حضنهم ع يا باجي
وماعادلي فوق كلمة الرحمه كلمه..
