المنبر التونسي(بسمات) – علقت بسمات التي افتكت منها الدولة ابنها وتبنته عائلة مقيمة بفرنسا دون علمها أو موافقتها، على تصريحات اخت الام التي تبنت “جود”.
وكشفت بسمات معطيات مغلوطة في تصريحات شقيقة الأم المتبنية.
وفي ما يلي ما نشرته بسمات:
يا مدام…كي اختك فالصبيتار ربي يفرج عليها…ولدي شكون بيه!!! كان جيت أنا بيصت فالسبيتار و خليت ولدي عند جارتي ولا صاحبتي خاطر ماعنديش خوات كيف اختك راهي الدنيا قامت و ماقعدتش و قالو عليا مهمله و مش لاهيه بولدي!!! باهي.. كي انتوما يا مدام مابدلتوش اسم ولدي و خليتوه باسمي هذا مضمون شكون!!
مضمون ولد عمي؟؟؟ باهي…أنا و الناس الكل ماعناش شك فالاجراءات الي صارت..طبيعي بش يتبدل اسمو لازم حكم تبني…و مدامو بش تطلعوه لفرنسا لازم باسبور.. تنجم تحكيلي كيفاه خذيتو
1)حكم للتبني
2) بدلتو الاسم
3)خرجتو باسبور
في أقل من شهر؟؟؟
ولدي خرج لفرنسا نهار 9/12/2019 معنتها يا مدام بين الايداع النهائي و خروج ولدي شهرين و 7 ايام!!! كيفاه؟؟؟؟ حتى بش تأخذ كرهبه يحبلك اكثر من هكا في تونس..هز الورقه هذي اطبع هذي صحح هذي ..لا هذي بدلها..الخ
و مانيش نحكي عالاجراءات الي بدأت في 2017 ماتعنينيش…الي يعنيني ..ولدي كيفاه خرج تبني بالسرعه هذي..و هذا هو الي بش يتحاسبو عليه الناس الي عندها دخل… للدرجه الايدارات ولات اكسبراس في تونس؟؟ علاش احنا حتى على تبديل بطاقة تعريف نضربو بالشهرين؟؟ باااهي…
تنجم تقلي كان جيت انتي في بلاصتي والنار شاعله فيك اش تعمل؟؟
يا مدام ولدي عمرو عام و 5 شعور..عند اختك 5 شهور…معنتها عندي أنا قعد عام..4 شعور يرقد كان في حضني والباقي فالجمعيه و نشوف فيه كل يوم و نبازز البيرمه فيهم الي يكذبني…
و براس امك لا عاد تقول امو و بوه..أنا امممووو و بوه انا الي ولدتو…و لازم الدنيا الكل تفهم الي مصلحه الطفل عند امو..خاطر حتى قانون ما يعلى على قانون “الطبيعة”
نحب نشكر مدام عربيه على كلمة الحق…و نحب نفهم العالم حاجه..عركتي الكبيرة مع المؤسسات و “المسؤولين” الي كل مره يبعثوني لبلاصه و كورو بيا كيما حبو…عركتي مع كل واحد شافني نبكي و مارحمنيش عركتي مع الناس الي ساكته على كلمة الحق..
ثقتي كبيره في ربي اولا..و في محاميا الاول الاستاذ الحبيب الزمالي الانسان الي وعدني و قلي يرجعلك ولدك حتى على جثتي ..والي وقف معايا من أول نهار لتوا..
و أكيد ثقتي كبيره فالاستاذه الجامعية سماح فقيه سالم..الي تعبت معايا والنوم نساتو في جرت حكايتي…
و ماننساش الناس الي واقفه معايا لا نعرفها ولا تعرفني “سنيه عبيد” و بررررشا ناس أخرى كان مش هوما صوتي مايوصلش…
أن شاء الله مع الاستاذ الحبيب الزمالي وبقية المحامين المتطوعين “يرحم والدين والديهم” حقي بش يرجعلي..ولدي جود حقي و مانسلمش في حقي للموت..
