المنبر التونسي (سرطان الكورونا) – نشر الدكتور زكرياء بوقيرة صورا لمصاب بالسرطان في بدايته وكتب :
ريتوها التصويرة هذي؟هذه تصوير بالأشعة لصدر انسان مصاب بالسرطان. نعرف كلمة كبيرة السرطان وبرشة عباد ما يعرفوش شنوا معناها.هاو بش نحاول نبسطلكم تبعوني وتو تفهموا وين نحب نوصل.السرطان كيفاش يتكون؟هو في الأول كان خلية صغيرة من جسم الإنسان كما الخلايا لخرين الكل. أما مرة من المرات الخلية هذي صارت فيها غلطة. وعكس اخواتها ولات تتكاثر بسرعة.من الأول الورم هذا كان كبروا أقل من عشر ميليمتر.
ولكن بقدرتو على التكاثر يواصل يكبر يكبر لين نوليو نجمو نشلق بيه في التصويرة.ريتوها الدورة الحمرة هذيكا هي الورم. كبرو بعض السنتيمترات وممكن حتى الشخص إلي عندو موش شالق بيه.توا كان يمشي لطبيب ويشخصلو حالتو، شنوا تتصورو الطبيب لازم يعمل؟يقلو لا ما تخافش، لن يصيبنا إلى ما كتب الله لنا، إنزل على الزيت الزيتونة والكسكسي بالدجاج، تفاؤل وتو يتنحى وحدو؟وإلا يقولو حمدولة إلي جيتني في الوقت صحيح إلي عندك حاجة مخطرة أما ما تخافيش نجمو نداويوها وتبرى؟ينجم المريض يعجبو الطبيب الأول خاطر يطلعلو في المورال ونحالو الخوف.
أما الطبيب هذاكا في الحقيقة قتلوا ما يبعدش برشة على كمال المغربي إلي يداوي بالبزاق.الطبيب الثاني صحيح فجع المريض قالوا راهو عندك مرض مخطر وينجم حتى يقتلك، أما زادة عطاه الحل وقالوا تنجم تبرا.الحقيقة مهمة بش تداوي مريض.بها هي نبنيو الثقة.وبها هي المريض يقبل الدوا.الدوا في الحالة هذي مش ساهل جملة وحدة. المريض بش ترصيلو يعمل عملية. تعرفوا شمعناها عملية؟عملية هي نعديو drogue في عروق المريض،
نخدروه لين ما عادش يتنفس وحدو. نحشيولو جعبة في القصبة الهوائية متاعو ونبرنشيوه مع مكينة إلي بش تنفسوا.الجراح يحلو بدنو بسكينة ينحيلو قطعة من بدنو (ثلث الرية اليمين) وبعد يسكر ونفيقوه.العملية مش حاجة ساهلة جملة وحدة. العملية بيدها تنجم تقتلوا. العملية زادة بش تخليه تاعب اسابيع لا يخدم لا شي.وهذا الكل بخلاف المصاريف متع الطبة متع الkiné متع التحاليل التصاور….هذا الكل مش ساهل أما لازم…نفس الشي في الكورونا ما حاجتكش بيش تستنى لين نوصلو كيما ليوم عنا 100 ميت في النهار بيش تعرف أنو المرض خطير.الحاجة هذي نعرفوها من أول شخص يمرض في البلاد.
من وقتها العملية لازمة.من وقتها لازم نضحيو ونوقفو السرطان.هذا الشي إلي عملناه في الموجة الأولى. عملنا حجر صحي شامل على 80 مريض و1 ميت. كملنا ب1000 مصاب و-50 ميت.في الموجة الثانية قالولنا تعايشو مع السرطان وهاو وين وصلنا أكثر من 6000 تونسي ماتوا…العملية موش ساهلة كما الحجر الصحي الشامل موش ساهل ولكنو لازم كان ما نحبوش البلاد الكلها تمرض.
