المنبر التونسي(زكرياء بوقرة) – قال الدكتور التّونسي زكرياء بوقرة إن “شهر رمضان سيكون صعبا وسيكون العيد حزينا” بسبب كورونا.
ونشر تدوينة مؤثرة على صفحته الرسمية على شبكة التواصل الاجتماعي الفايسبوك:
رمضان صعيب وعيد حزين بش يتعداو علينا
بربي ردو بالكم.
الي ينجم ياخو كونجي ياخذو.
الي ينجم يبطل الخدمة يبطلها.
صغاركم خليوهم في الدار.
الي ينجم يخدم عن بعد يعملها.
حاولو بكل ما عندكم من قوة انكم تحميو رواحكم وعايلاتكم.
الكابوس بش يبدا توة.
النهار الي عندي عام نحذر فيكم منو جاء
مسكين شعب تونس بالرسمي مسكين.
نقولو فيه الي نحبو بليد قبيح لسانو خايب اما في الداخل قلبو باهي وحنين. بالرسمي ما نستحقوش يصير فينا الي بش يصير.
والله حرام.
حرام العايلات الي بش تشتت.
حرام الصغار الي بش تتيتم.
حرام الناس الي بش تبدى تبكي على نفس.
حرام العباد الي بش تجوع هي وصغارها.
والله حرام الي عملوه فينا.
نستحقو خير من هكا.
#حجر_صحي_شامل
