المنبر التونسي (علم الوراثة) – في تدوينة على صفحته الرسمية على الفايسبوك كتب الدكتور حاتم الغزال رئيس قسم علم الوراثة بالمستشفى العسكري بالسعودية تدوينة حاول من خلالها طرح جملة من المعطيات للمساعدة على الاختيار والتوجه نحو مراكز التلقيح غدا الاحد .
كما قدم الدكتور الغزال خاصيات تلقيح استرازينيكا .
وفيما يلي نص التدوينة :
• “التلقيح المستعمل غدوه باش يكون تلقيح أسترازينيكا و هو من أكثر التلاقيح الي تعملت عليها دراسات في الدول المتقدّمة و نعرفو بالتفصيل كل خصوصياته و هو من أكثر التلاقيح الي أنا شخصيا عندي ثقة كبيرة في شفافية و صدق المعلومات المتعلقة بيه لأنه تلقيح غير ربحي و تشرف عليه جامعة أكسفورد.
• التلقيح هذا يحمي تقريبا بنسبة 100% من الوفاة بالكورونا بعد أسبوعين من الجرعة الثانية. يعني أي إنسان يمشي يلقّح غدوه و يرجع في الموعد و ياخذ الجرعة الثانية بحول الله بعد 15 سبتمبر ما عاد حتى واحد منهم يموت بالكورونا. صحيح تنجم تكون ملقح و تمرض بأعراض بسيطة و نادرا تكون الأعراض أكثر خطورة و لكن الوفاة بالكورونا تولي حاجة نادرة جدا كيما تقول إنت امكانية أنه الملقح يمشي في الشارع يطيح عليه محبس يقتلو أكبر من انه يخطف فيروس كورونا و يقتل
و.•التلقيح هذا يتعمل بزريقة صغيرة في الكتف ما توجعش و ما تدومش أكثر من زوز ثواني و الزريقة تتلوح ما تخافوش من أنكم تتعداو بسببها بأمراض أخرى.
• التلقيح هذا الخفظ متاعو ساهل ياسر في فريجيدار عادي و ما يعدمش حتى كي يقص عليه الضو ساعة و إلا ساعتين يعني ما تخافوش من طريقة الحفظ متاعو في مراكز التلقيح و إلا قبل التوزيع متاعو.
••• نجيو تو للقلق الي ينجم يسببو التلقيح :- نهار الإثنين ممكن ياسر تجيك شوية سخانة و إلا وجايع في المفاصل و فشله و وجيعة راس. حاجه عادية جدا و ما تخوّفش و يكفي انك تاخذ “دوليبران” و الا “إفيرالغون” نهارتها و من غدوه تصبح لاباس إتدندن كاينك ما لقّحتش.- البلاصة متاع الزريقة ممكن تقعد توجع فيك نهارين و إلا ثلاثه أيام و ساعات حتى جمعه و ممكن تتنفخ شويه و إلا حتى في حالات قليلة تعمللك ولسيس في ضبوطك… كيف كيف الحكاية ما تخوّفش بالكل و تمشي على روحها في أيامات و تنساها.
••• صحيح ثمة حالات نادرة جدا خطيرة متاع تجلط الدم بعد التلقيح بأسبوع او أسبوعين كيما عدد كبير جدا من الدوايات الي نستعملو فيهم كل يوم. باش تكون الصوره واضحة يعني لو كان نجحنا غدوه في تلقيح 500 الف مواطن في كامل الجمهورية ممكن من بينهم الكل واحد او إثنين على أقصى تقدير يصيرلهم تجلّط بسبب التلقيح و هاكا علاش في آخر الجمعة الجاية و الجمعه الي بعدها إلي يحس بآلام كبيرة في صدرو و إلا في راسو و إلا بمشكلة في النظر أو يطلعلو نفاخ و إلا بقايع في بدنو يلزمو يمشي يعدّي باش يعملولو التحاليل اللازمة. مرة اخرى انذكّركم الي الأعراض هاذي تظهر بعد جمعة يعني الوجايع الي باش تجيك نهار الاثنين ما عندهاش حتى علاقة بتخثّر الدم و ما تستحقّش باش تمشي للطبيب على خاطرها.••• نجيو تو لشكون ما يلزموش يمشي غدوه لمراكز التلقيح :- الناس الي أعمارهم تحت ال40 خاطر باش يعملو زحمة بالزايد و موش باش يلقحولهم.
– الناس الي عملو جلطة و إلا عندهم نقص في عدد خلايا الدم البيضاء و في صفائح الدم و إلا ياخذو في أدوية إتطيّح المناعة خاطر عاملين زرع أعضاء و إلا يداويو على سرطان. هاذم الكل الأفضل أنهم يستناو دورهم و ياخذو تلقيح بفيزر او موديرنا خاطر منصوح بيه ليهم أكثر من استرازينيكا.
