الشواشي: “الشعب التونسي الذي أسقط منظومة بن علي قادر على إسقاط منظومة سعيّد”

كما أوضح الشواشي أن الشعب التونسي الذي أسقط منظومة بن علي بعد 23 عاما قادر على إسقاط منظومة قيس سعيد، قائلا: ” المبادرة هاذي فيها الجانب الدستوري القانون لأنو اليوم عنا زوز دساتير، الدستور المعترف بيه من طرف الأغلبية دستور جانفي 2014، اللي أنا مازلت نعترف بيه، وفما دستور السيد قيس سعيد اللي هو منشور في الرائد الرسمي…فما جانب سياسي: كيف نتعاطئ مع السيد قيس سعيد الذي افتك كل الصلاحيات الذي دمر كل مؤسسات الدولة… كيفاش نتعامل مع سلطاتو هو اللي يستمد فيها من قوة السلاح متاع الجيش التونسي أحببنا أو كرهنا، اليوم يلزم فما الجانب السياسي يقع التدارس متاعو، نلقاو الصيغة اللي تخلينا ننتقل في كنف السلمية والسلاسة من المرحلة الراهنة إلى مرحلة جديدة..فما جانب اقتصادي واجتماعي: أنا أعتقد اليوم مش مطلوب منا فقط الخروج من الأزمة السياسية، ضروري الأزمة السياسية نخرجو منها ويكون هناك استقرار سياسي وحكومي بش نقوموا بالإصلاحات ولكن الإصلاحات يلزمنا نتفقوا عليها من الآن، أنا شخصيا غير مستعد اليوم أني نواجه منظومة قيس سعيد ونساهم في بناء وتأسيس منظومة جديدة بدون أن تكون لها أولوياتها اقتصادية واجتماعية يلزمنا نتفقوا الآن كل الأطراف الاجتماعية، منظمات خاصة وطنية والأطراف السياسية يلزمنا نتفقوا نحطو أولويتنا هو التونسي ومعيشتو وصحتو وتعليم وأمنو، اتفقنا على هاذي نحاولوا نتجاوزوا الأزمة السياسية ما اتفقناش راهو ماناش في حاجة اليوم بش نخرجو من أزمة ونلقاو رواحنا في أزمة أخرى، قانون المالية سيقع التصدي ليه ولن يتم تفعيله، وسيقع عصيان مدني اليوم لتركه جانيا ولن يطبق ولن ننتظر 2023 بش نبداو متفقين، اليوم 14 جانفي على منظومة قيس سعيد أن ترحل، انتهت منظومة قيس سعيد وعهدته، وحكومته بالنسبة لنا لا شرعية ولا كفاءة لها ولا يمكن أن نسايرها في أي شيء وريتو قانون المالية أغلب المنظمات الوطنية قالك سنتصدى له، السيد العميد البارح هدد بالعصيان الجبائي، ومنظمة الأعراف قالت هذا قانون يكرس لدولة المجبى، وسيزيد من تفقير وتجويع وتعميق الأزمة الاقتصادية الاجتماعية، هذا قانون بش يعمل انكماش بالاستثمار.. نحنا ما تهمناش صندوق النقد، مش مشكلتي، نعملوا اتفاقية مع صندوق النقد ولكن يلزمك قانون مالية يخدم التوانسة، صندوق النقد عمرها ما تعمل قوانين بش تفقر التوانسة، تعمل قوانين انت تطلب منها قروض هي تقلك راهو فما إصلاحات يلزم تقوم بيها، هاذي حكومة لا تنجم تعمل إصلاحات ولا تنجم تسير دولة، هاذي أتعس وأضعف وأفشل حكومة منذ الاستقلال إلى الآن، وستقع محاسبتها قضائيا وسياسيا وتاريخيا، وماشي في بالهم رئيس الدولة يتحمل المسؤولية بمفرده سيتم محاسبته بمفرده، لا هذه الحكومة فردا فردا أجرموا في حق الشعب التونسي وهذا القانون وسيلة متاع جريمة قاعدين يقترفوا فيها في حق الشعب التونسي، اليوم حتى مساندي قيس سعيد ضد هذا القانون، أعطيني تونسي وحيد مقتنع بهذا القانون.. سنبلور كما فعل التونسيون والتونسيات مع منظومة بن علي بعد 23 سنة وأسقطوها في ظرف 27 يوم، نفس الشعب العظيم وهو كذلك سيسقط منظومة قيس سعيد، وسيكون لنخبة هذا الشعب دور فاعل، وهذا اللي قاعدين نعملوا فيه، لأنو مش فقط سنسعى فقط إلى إسقاطو وتركيز منظومة اجتماعية ديمقراطية جديدة قادرة أنها تلبي انتظارات التوانسة، انتوما تراو فيه بعيد نحن نراه قريبا، كيما الناس اللي كانت تدافع على نظام بن علي لآخر لحظة وفما دول تدافع على نظام بن علي لآخر لحظة ولكن بالرغم من ذلك الشعب التونسي أسقط منظومة بن علي، وبالتالي ليس بالعزيز عليه أن يسقط منظومة قيس سعيد وهي اللي عندو بعض الأشهر واكتشف الشعب التونسي مدى هشاشة وضعف هذه المنظومة”.