المنبر التونسي(كورونا) – نشر الدكتور ماهر العباسي طبيب التخدير والانعاش تدوينة على صفحته على الفايسبوك طرح فيها مسألة انخفاض عدد الوفيات في تونس بفيروس كورونا .
واستعرض العباسي في تدوينته عدة فرضيات جاءت كالتالي :
علاش عدد الوفايات متاعنا قليل ياسر ؟
* أولا يلزمنا نعاودو نعملو تدقيق في عدد الوفايات ويلزمنا دراسة معمقة لوفايات جانفي وفيفري .. وخاصة الوفايات عند الكبار في السن ونقارنوهم بالسنوات الي فاتت خاطر اليوم تمّ التأكد علميا أنو الفيروس موجود في فرنسا من ديسمبر وفي إيطاليا من جانفي ودونك وارد جدّا يكون دخل لتونس في جانفي وفيفري وقت الطقس أبرد وينجم يكون وقتها عندو فاعلية أكثر وخطورة أكبر . ولكن حتى في الحالة هذي موش باش تكون الوفايات بالآلاف ممكن نتعداو من 42 ل100-200 ماكسيموم . ودونك يقعد العدد ضعيف ياسر مقارنة بأوروبا .
* الإجراءات الي خذاتهم الدولة التونسيةكانو ممتازين خاصة في ال3 جمعات الأولى متاع مارس ( تسكير الحدود / المكاتب / الملاعب / مراقبة المسافرين / الحجر الذاتي وبعد الشامل ) والإجراءات هذي الي كانت مبالغ فيها أكيد أنها قلصت تفشي الفيروس ونقصت من عدد الوفايات
* ولكن هذا وحدو مايفسرش … الأكيد أنو فمة أسباب أخرى :
* تنجم يكون الفيروس تحوّل في شمال إفريقيا وولى أضعف ببرشة
* ينجم الطقس سخانة ورطوبة ضعفت الفيروس ونقصت مالعدوى متاعو
* تنجم أشعة الشمس تكون عندها دور في قتل الفيروس
* ينجم تلقيح الBCG يكون عمل مناعة تقاوم الفيروس
* ينجم يكون عمر التوانسة الي يعتبر صغير مقارنة بإيطاليا مثلا ساعم انهم يقاومو الفيروس أكثر .
===> العوامل المختلفة هذي تخلي مالمستحيل اليوم يقوم إنسان يقلكم راو العدد الصغير مالوفايات جاي مالقرار هذا والا مالحكاية هذي .
===> يظهرلي مايلزمناش ننطلقو في بروباغندا حكومية ونقولو أنو النتائج هذي جاية فقط مالحجر الصحي الشامل خاطر هذا فيه خطر كبير على صحة التوانسة … خاطر المرض هذا ممكن يرجعلنا العام الجاي وأحنا شايخين نعملولو حجر شامل نص لباس كيما السنة ياخي يحصد آلاف الأرواح خاطر السبب الي أنقذنا السنة ماعملناش مجهود باش نفهموه ونطلعوه بين عديد الأسباب الي تنجم تكون منعتنا ودونك خرجنا بخلاصة ساهلة خاطر تخدمنا سياسيا . وعلى خاطر زادة الفاتورة الإقتصادية الي دفعناها السنة غالية ياسر … ولو كان يطلع الفيروس هذا ماعندوش خطورة كبيرة علينا لاحد الاسباب الي ذكرتها يولي قرار الحجر الشامل وخاصة تمديدو لأسابيع طويلة قرار خاظئ وكارثي ومايلزمناش نعاودوه العام الجاي .
===> الخلاصة : بلادنا مستحقة لتحليل علمي بعيد عالسياسة : والتحليل العلمي تعملو جهة مستقلة كيما عمادة الأطباء وتعطينا تفسير لظاهرة الكورونا في تونس باش نستخلصو الدروس خاطر المرض هذا ممكن يرجع غدوة ويلزمنا كبلاد تكون عنا استراتيجية علمية واضحة لمجابهتو مرتكزة على تجربتنا السابقة … الباهي ندعموه والغالط ماعادش نعاودوه
