المنبر التونسي(سمير الوافي) – هاجم الاعلامي سمير الوافي فنانة تونسية على خلفية اشاعة مرض صديقه علاء الشابي.
وفي ما يلي نص التدوينة:
الله غالب ما نجمش نترفع المرة هذي…خاطر المستهدف موش أنا…المستهدف هو صديقي علاء الشابي ربي يشفيه…!
سمعت اليوم فنانة تحكي على تفاصيل مرضو في الراديو من غير ما تشاورو… وتبكي وتهول وتدعي أنو مصاب بالمرض الخبيث وقرر يعيش في عزلة…عيب نستعملو مرض صديقنا باش نعملو بوز على حساب معنوياتو وصورتو وكرامتو…بكلام غالط وكاذب يطيح المورال…!
علاء مريض لكن مستبعد جدا أنو يكون مصاب بالمرض الخبيث…ومرضو حسب التحاليل الأولية موش خطير وعلاجو ممكن ومتاح…والتحاليل القادمة باش تحسم في ذلك…!
– علاء موش في عزلة بل يقابل ويكلم في صحابو المقربين عادي…ويخدم على روحو في ظروف عادية…ومعنوياتو عالية وستبقى عالية إذا إحترم البعض حرمة المرض ونقصو م التفركيح…ولو كان ذلك باسم الصداقة والمحبة…!!
– المرض حاجة شخصية والمريض عندو حرمة حتى لو مصاب ببرونشيت…وفمة أخلاقيات في التعامل مع المريض…نحترمو خصوصياتو ونراعيو معنوياتو ونتجنبو إحراجو والحديث على تفاصيل مرضو…واذا تحب تبكي عليه موش قدام الكاميرا وفي الاعلام وللايهام بخطورة مرضو…بينما هو مازال في مرحلة التحليل وما فماش ريسك كبير…!
– الحمد لله على اللطف…وما تخافوش على علاء…إيمانو قوي ومورالو الفوق…والمرض موضوع حساس برشة لازم واحد يرد بالو برشة كي يحكي فيه…
وكانت الفنانة إيمان الشريف قالت في برنامج نجوم السبت 6 جوان 2020 أنها اتصلت بعائلة الإعلامي علاء الشابي للاستفسار عن حالته الصحية بعد التدوينة التي نشرها على فيسبوك.
وتحدثت إيمان الشريف عن الوضعية الصحية لعلاء الشابي باكية، قائلة إنه أمام مرض خبيث وأن الخبر كان بمثابة الصدمة.
وتابعت في هذا الإطار ‘ اتّصلت بالعائلة لأنني صديقة مقربة وتأكدت من مرض علاء الشابي وأنا مصدومة.. علاء المحب للحياة وجد نفسه اليوم أمام مرض خبيث واختار أن يكون في عزلة.. وأتمنى أن تكون نتائج التحاليل التي خضع لها خاطئة..’ .
