المنبر التونسي (خلف الله الخلصي) – علق المخرج خلف الله الخلصي ابن المرحوم حسن الخلصي على تصريح علي بنور في برنامج “ديما لاباس”.
ونشر التدوينة التالية على صفحته الرسمية على شبكة التواصل الاجتماعي:
إلى الممثل القدير علي بنور
عيب عليك تغير الوقائع باش تخرج انتي بطل على حساب غيرك يا اما تحكي الحكايات كيف ما صارت و إلى ما تحكيهاش وطبعا كان حكيتها كيف ما صارت بش يتنحالك منها الجانب البطولي، و تجرأت و حكيتها غالطة لأن الشخص المعني الله يرحمو ما فماش شكون باش يجاوبك. .نحب نقلك إلي وقت الحادثة إلي صارت بين الممثل القدير حسن الخلصي و المخرج الاستاذ الحبيب المسلماني أنا كنت موجود في الكواليس خاطر كنت نستنا في الوالد الله يرحمو يكمل المشهد الوحيد في النهار هذاكا باش نوصلو خاطر عندو موعد وكان متغشش لأنهم جابوه على مشهد واحد في حين انو هذا المشهد كان يتحط مع بقية المشاهد إلي عندو نهار آخر، ياخي فسرولو و قالولو أنها ضروف إنتاجية حكمت ،لا علينا موش هاذا موضوعنا.
إلي صار يا سيييييد علي أن الحكاية صارت قدامي و سي الحبيب المسلماني ما جاش يعيط على حسن الخلصي لانو حتى واحد ما كان يتجرأ أنو يقلو كلمة خارجة عن سياقها و الناس الكل تعرف هذا، ابدا من سيادتك و بقيةالممثلين والمساعدين والتقنيين. هو كان سوء تفاهم بين الإثنين ووصل للتلاسن بيناتهم و طيش حسن الخلصي السيناريو و قال ماعادش باش نصور و كل ما عملتو انتي هو أنك حبيت تهدي الجو بين الإثنين، و ليس العمل البطولي اللي حكيت عليه مع نوفل الورتاني، إلي طبعا إنتي حكيتلو على مواقفك البطولية في كواليس المسلسلات الكل باش من بعد يقوم بتحضير السؤالات. و فشلت محاولات تهدئة النفوس وخرج حسن الخلصي عن السيطرة و غادر مكان التصوير و ألغي المشهد . حبيت نقلك يا صديقي العزيز و احنا صحاب بلحق اللي راهو مش إنتي إلي وقفت التصوير بموقفك و بغيرتك على أصدقاءك إنما التصوير ما صارش لأن صديقك المرحوم غادر الموقع. وما رجع حسن الخلصي إلا بعد اسبوع بعد ما كلمو المدير العام للتلفزة في الوقت هذاكا و الأستاذ الحبيب المسلماني ربي يفضلو .
