المنبر التونسي (لزهر الضاوي) – رثى الشاعر الشعبي الملتزم لزهر الضاوي الطبيب الشاب الذي وافته المنية بعد سقوطه من مصعد معطل في مستشفى جندوبة بالقصيدة التالية :
-* مصعد الموت*-
( بمناسبة وفاة الطبيب الشاب “بدر الدين العلوي” في “مصعد الموت” بمستشفى جندوبة)
حتى “المصعد” رافض يصعد..
في بْلادي….” بلاد السقوط”..؟؟!!
اشهد يا “جندوبة”..اشهد..
كيفاش طبيبك يموت..؟؟!!
وإيجا تفرّج..شوف المشهد..
ولّا زايد…..فات الفوت…!!
مغدور..وما لْحَقْ” يشَهّد “..
في حفرة..بين زوز حيوط…!!
على بلادو ..طايح يتنهد..
ع القاعة..يفرفت مخبوط…!!
…على بلادو الْ صارت “دونيّة “..
مع “العصابة الاخوانية”..
وولّت مسهلها “المَنيّة”..
و”الكبّوط” وراء “الكبّوط”..؟؟!!
” بدرة”….يا “عز لولاد.”..!!
ياللي “حسدوك الحساد”..!!
بلادك هرْدوها الفِسّاد..
لْعَب عليها “الأخطبوط”…!!
..يا خسارةْ زينك وشبابك…
والليعة في قلوب أحبابك…
غدوة.. يديروا ليك “دْرابك”..!!
فيها السافل والشخبوط….!!
..ويتلاقوا جميع الأوغاد..
ويزيدوا “المصعد” “للواد”..
و “البالوعة”..وكي المعتاد..
الشباب اللي كلاه الحوت…!!
..وما دام احنا مشنا “عباد”…
باش يبقى يمركي “العدّاد” ..
وكيف الهازل كيف الجاد..
أحنا طبّعنا مع الموت…؟؟!!
الكلّة …. طبّعنا مع الموت… ؟؟!!
( قفصة2020/12/04)
