المنبر التونسي(الديوانة التونسية) – قالت اميرة البحري طبيبة تونسية مقيمة في سويسرا انها قامت بجمع مساعدات لفائدة اطفال الشمال الغربي من ملابس واحذية واغطية وادوات مدرسية والعاب ودرجات هوائية وارسلتهم عبر الباخرة الى تونس وعند وصولها لتتسلم المساعدات وتوزيعها على الاطفال فوجئت بالديوانة تحجز المساعدات.
وفي ما يلي نص التدوينة التي نشرتها على صفحتها الرسمية على شبكة التواصل الاجتماعي:
وقت اللي نعدي اكثر من شهر نجمع في التبرعات من سويسرا و نسهر لماضي ثلاثة متاع الصباح كل ليلة باش نفرز و نحط في السيكان و نحضر الاوراق الخ الخ…
وقت اللي عندي عشرين سنا نعمل في العمل الانساني و لا نهار صارلي مشكل لا في تونس لا في اوروبا
وقت اللي الناس يعطيو دبشهم و كتب و صبابط و صابون و ادوات مدرسية و غطاء و كل ما يجيني هبة دموعي تولي في عينيا من الفرحة اللي وليداتنا في الشمال الغربي باش يلقاو ما يلبسو
وقت اللي تعطي من وقتك و من عايلتك و من صحتك و من اعصابك باش ترا الفرحة في عينين الصغيرات في تونس
وقت اللي باش نهبط لتونس غدوة الحي من سويسرا باش نمشي للصغيرات في القصرين نهار الاحد و نرجع لسويسرا نهار الاثنين
وقت اللي الديوانة التونسية تاقف و ما تخليناش نخرجو الاعانات و
يكرهوني في خدمة بلادي
يكرهوني في البيروقراطية
يكرهوني في العمل الانساني لبلادي
شنوة يحبو؟؟ نرجع نعاون في اوروبا و نخلي بلادي تنهشها الكلاب و وليداتنا عريانين و بردانين؟؟؟
ارحمو من في الارض يرحمكم من في السماء
20 سنة درت العالم في العمل الانساني طبيبة و حبيت نعاون بلادي. كرهوني في روحي اما ما يكرهونيش في بلادي
#بلادي وان جارت علي عزيزة
#باش نخرجو الاعانات و نمشيو نهار الاحد
#بلادي اولى بالاعانات
#طبيبة كرهوها في خدمة البلاد
