المنبر التونسي(سوسن المعالج) – علقت الممثلة سوسن معالج على الجدل الحاصل بخصوص عودة تصوير المسلسلات الرمضانية.
وفي ما يلي نص التدوينة:
الحجر نجّمتو أما النفاق تعبني الحقيقة :
مقرف اعتراض بعض الإعلاميين و الفنانين على قرار حكومي “لاستكمال” مسلسل ، استكمال يا ربي حني !!
على اعتبار فريق سينما ولا تلفزيون هو مجموعة من المعاتيه المهبلة القصّر ، الي ما يفهموش آش معناها إجراءات وقاية. ولازم كميونة بوب في جرتهم ، و بوليس شادد ميترو ما بيناتهم، يمشيشي، بالكشي يهددو الأمن العام .
والله لا تحشمو !
للي ما يعرفش طبيعة خدمتنا، نحب نأكّدلو الي تصوير في ديكور مغلق أو حتى خارجي ، لمدة محدودة ، ما يجيش عشر التهديد الي ينجم يجي من بلاتوات التلافز و الراديونات الي تشوفو و تسمعو فيهم يوميا ، مالماكياج ، للكثافة الكرونيكوزية ، للمونتاج ، البوست برود، اجتماعات التحرير … وانت ماشي ، واحنا علاش لازم الحكومة تتدخّل؟
علاش مش راو الأمر موكول للمنتج و فريقه؟ من أول الزمان علاقة المهنة بالأمن و الحماية و الصحة آخر ألسطه، شبيكم رديتوها قضية رأى عام وامن قومي ؟ يا سيدي احسبوهم هاك الي طلعو للسفارة هاك العام و سايسناهم في إطار حرية التعبير .سايسوهم ، جماعة المسلسل ميسالش ، عايلات تستزرق منو، ولا نسيتوها الجملة هذي كي ولات فيها أوديمات رمضان و انتوما هابطين تكورو السنة؟
والله لا تحشمو ×2
نتفهم انك تكون متعارك مع مولى قناة معينة ، ولا عندك غزّول تجاه عمل معين، انا شخصيا نستعرف عندي برشة نتمنى يتقطعو مالسوق !
أما هذا عمرو ما يخليك تضرب إجراء أو قانون فقط لأنو يخدم المنافس متاعك خاصة وقت تبدا انت تخدم، ماشالله صباحا ، مساءا و يوم الاحد وفي أكثر من قناة .
والله يعترض الجهاز الصحي نفهم ! أما يعترضو الفنانين، هذا تحقير و استصغار لوعي ودور أهل المهنة ، منتج ولا مخرج ولا ممثل ، نحبوه ولا نكرهوه ،
بالنسبة لأصدقاءنا الإعلاميين الي يخدمو في التلافز الموضوع المفروض ما يتطرحش جملة خاطر مش معقول تكونو طرف و حكم في نفس الوقت . عيب .
و زيد حتى لتوا ، عمليا وإجرائيا و الي تحبو انتوما، المسلسلات هي الي رصّت الشعب في الدار، مش الأخبار والملفات و الجنائز وسي عناء.
