المنبر التونسي (القيروان)-نشرت الدكتورة هاجر مرزوق تدوينة هي عبارة عن شهادات حية من القيروان ثكشف السر وراء تفشي الكورونا في الولاية بشكل كبير .
وكتبت الدكتورة :
تعرفو علاش صاير هكه في القروان
خاطر من بين 24 مريض شفتهم في العيادات الخارجية نهارين لتالي، 1 لقحت و 1 سجلت و باش تلقح بعد نهارين و 1 سجلتلو بنتو و كيف جاء دورو قلي”فصعت و دورتها للقهوة” !!!صدقوني مهاش نكتة٠
مرا كبيرة قلتلها علاش ما لقحتش عمرك 70 سنة و عندك سكر و دم و عاملة جلطة قتلي شاهيتو شهوة أما ولادي ماخلاونيش !!! صدقوني مهاش نكتة زادة٠٠٠
نطلع لقسم كوفيد نلقى بحذا كل مريض 2, 3 زيار و ساعات أكثر ٠ صدقوني مهاش نكتة زادة٠٠٠
كيف ناخو لواج من القروان، نعديووها طريق كامل إلبس بافات دورية و أكهو نحيو البافات!!! صدقوني مهاش نكتة زادة٠٠٠
تجي تحكي معاهم يقولولك قضاء و قدر و إلٌي كاتبو ربي يصير و و و و يحسسوك إلٌي إنت أبو لهب في وسطهم٠٠٠
وفي القروان زادة عرس يلم أكثر من ألفين شخص مش على حاجة أما يلم في الرشوق!!! صدقوني مهاش نكتة زادة٠٠٠
أكيد اللوم بعد القضاء بدعة٠٠٠ أما زادة لازم نفهمو شنوة صار خاطر إلٌي صار في القروان باش يصير في تونس الكل وقتها كلنا باش نقولو باااااااااااااع٠
إلٌي يغير عل القروان يعتبر روحو حامل للفيروس و يلبس 2 بافاتات و مش وحدة أكهو و لروحو مش للدورية٠٠٠
إلٌي يغير عل القروان ما يخرجش إلآ للضرورة القصوى٠٠٠
إلٌي يغير عل القروان ما يزورش والديه و يلقحلهم و يلقح لروحو٠٠٠
غير هكه تجغجيغ فارغ٠٠٠
